News Details

የኢትዮ-ኩዌት ቢዝነስ ፎረም በኩዌት ተካሄደ

18 Nov 2019 Print this page

 

የኢትዮጵያ እና የኩዌት ቢዝነስ ፎረም ዛሬ ህዳር 9 ቀን 2012 ዓ.ም በኩዌት የንግድና ኢንዱስትሪ ም/ቤት ተካሂዷል፡፡

በኩዌት የኢፌዲሪ ልዩ መልዕክተኛና ባለሙሉ ሥልጣን አምባሳደር አብዱልፈታህ አብዱላሂ የቢዝነስ ፎረሙን በንግግር በከፈቱበት ወቅት እንደተናገሩት፥ ኢትዮጵያና ኩዌት የረዥም ጊዜ ኢኮኖሚያዊ እና ዲፕሎማሲያዊ ግንኑነት እንዳላቸው ገልጸው፤ መሰል መድረኮችን በማካሄድ ግንኙነቱን በንግድና ኢንቨስትመንት ማጠናከር ይገባል ብለዋል።

ኢትዮጵያ ለውጭ ኢንቨስትመንት ምቹ መሆኗን የጠቆሙት አምባሳደሩ፥ አገሪቱ የውጭ ኢንቨስተሮችን ለመሳብና ለማበረታታት ልዩ ትኩረት ሰጥታ እየሰራች መሆኗን አብራርተዋል።

ክቡር አምባሳደሩ የኢትዮጵያ አየር መንግድ ሁለቱን አገራት በማገናኘት ረገድ ከፍተኛ ሚና ያለው መሆኑን ጠቁመው፤ በሁለቱ አገራት መካከል ያለው የንግድ ልውውጥ መጠን ከጊዜ ወደጊዜ እያደገ መሆኑን ተናግረዋል። ይሁን እንጂ የንግድ ሚዛኑ ለኩዌት ወገን ያደላ መሆኑን በመጠቆም ወደፊት አዳዲስ የንቨስትመንትና የንግድ እድሎችን በማስፋትና በማጠናከር ግንኑነቱን ወደ ተሻለ ደረጃ ማሸጋገር እንደሚያስፈልግ ገልጸዋል፡፡

አምባሳደር አብዱልፈታህ በፎረሙ ላይ የኩዌት ባለሃብቶች በግብርና ማቀነባበር፣ በግብርና ምርት፣ በጤና፣ በቱሪዝም እና በሎጂስቲክስ ዘርፎች ላይ እንዲሳተፉና ከኢትዮጵያውያን ባላሃብቶች ጋር በሽርክና እንዲሰሩ ጥሪ ያቀረቡ ሲሆን፤ የኢትዮጵያ መንግሥት ለኢንቨስተሮቹ አስፈላጊውን እገዛ እንደሚያደርግ ገልጸዋል፡፡

አምባሳደሩ አክለውም፥ መንግሥት በአገሪቱ መዋዕለ ንዋያቸውን ለሚያፈሱ ለውጭ ባለሃብቶች ምቹ ሁኔታን ለመፍጠር የተለያዩ የኢንዱስትሪ ፓርኮችን መገንባቱን ገልጸው፤ ይኸው ተጠናክሮ እንደሚቀጥል አብራርተዋል።

በፎረሙ ላይ ስለኢትዮጵያ የኢንቨስትመንት አማራጮች፣ የኢንቨስትመንት ዕድሎችና ማበረታቻዎች፣ እንዲሁም ስለ ኢትዮጵያ አየር መንገድ የስኬት ጉዞ ሰፊ ገለጻ ተደርጓል።

በኩዌት የንግድና ኢንዱስትሪ ም/ቤት ረዳት ዋና ዳይሬክተር ክቡር ኢማድ አል-ዛይድ በበኩላቸው፥ ኢትዮጵያና ኩዌት ጠንካራ ግንኙነት እንዳላቸው ገልጸው፤ በኢኮኖሚው ዘርፍ ያላቸውን ግንኙነት የበለጠ ለማሳደግ መስራት ያስፈልጋል ብለዋል።

ረዳት ዋና ዳይሬክተሩ ኢትዮጵያ 70% የሚጠጋውን የነዳጅ ፍላጎቷን ከኩዌት በምታስገባው የነዳጅ ዘይት ምርት እንደምታሟላ ገልጸው፤ ቡና፣ የቅባት እህሎች፣ የቁም እንስሳት፣ አበባ እና የሥጋ ምርቶችን ደግሞ ለኩዌት ገበያ እንደምታቀርብ ተናግረዋል።

የቢዝነስ ፎረሙ በፕሪሳይንስ ሰርቪስ ሰፖርት ኃላፊነቱ የተወሰነ የግል ማህበር አስተባባሪነት በውጭ ጉዳይ ሚኒስቴር የኢቨንስትመንት ማስፋፊያ ዳይሬክቶሬት ጀኔራል፣ በውጭ ንግድ እና ቱሪዝም ማስፋፊያ ዳይሬክቶሬት ጄኔራል፣ በኩዌት ንግድና ኢንዱስትሪ ም/ቤት፣ ኩዌት በሚገኘው ኢፌዲሪ ኤምባሲ እና በኢትዮጵያ አየር መንገድ የኩዌት ቅርንጫፍ ጽ/ቤት በጋራ ትብብር የተዘጋጀ ነው።

አላማውን የኩዌት ኢንቨስተሮችን መሳብ እና የንግድና የቢዝነስ ለቢዝነስ ትስስርን ማጠናከር ባደረገው በዚሁ የቢዝነስ ፎረም፥ ከኢትዮጵያ እና ከኩዌት የተወጣጡ በርካታ የቡና፣ የጥራጥሬና ቅባት እህሎች፣ የአበባ፣ የማር፣ የቁም እንስሳት እና የሥጋ ላኪና አስመጪ ባለሃብቶች ተሳተፈዋል።